This article was brought to you by our brand-new Gaeltacht team. For an English version, please click here

BHÍ AMHARCLANN SMOCK Alley lán go doras an tseachtain seo le h-aghaidh dráma Gaeilge an tseachtain seo.

An rud is annamh is iontach, deirtear, ach nuair a chloiseann tú gurb é Moglaí Bap ó Kneecap a scrígh Minimal Human Contact, dráma a ínsíonn scéal fén streachailt a raibh ag an ceoltóir roimh do bheith ina bhall den banna iomráiteach leis an gcearrbhachas, tuigeann tú cén fath cuid den chúis le na sluaite. 

Is é Aisling Ghéar, an compántas amharclainne ó Bhéal Feirste a bhunaigh athair Moglaí Bap, Gearóid Ó Cairealláin, atá ag léiriú an dráma agus is í Bríd Ó Gallchóir, baintreach Ghearóid, an stiurthóir.  

Tagraíonn teideal an dhráma seo, Minimal Human Contact, leis an gcleachtas a bhíonn ag casainí le cinntiú go bhfanann custaiméirí ag caitheamh a gcuid airgid go dtí go mbíonn sé go léir imithe. 

Bionn tae, ceapairí agus brioscaí ar fáil saor in aisce agus, déanach san oíche, le cinntiú nach dtéann daoine abhaile, cuirtear bia Síneach ar fáil.

Seo aon fhir é seo agus is é John (Seán T. Ó Meallaigh) an pearsa lárnach.  Tá roinnt comhráití ag titim amach – comhrá idir é féin agus an fear mór slándála ag an doras agus le roinnt de na cearrbhaigh eile sa chasaíne.

Saol as radharc saol an chearrbhaigh.  Bionn siad istigh sa chasaíne gan aon radharc acu ar an saol lasmuigh agus tá cúis le sin.   Cailleann siad gach ceangal atá acu leis an saol lasmuigh fhaid is atá siad ag cailliúint a gcuid airgid, nó i gcás ár laoch, an t-airgead a ghoid sé as tarracán a mhathair. 

Bíodh is gur gadaí é John, is duine taithneamhach é ach ní ligeann sé air féin gur duine deas é agus é i mbun an meaisín roulette.  Tá sé lán le néaróga – tá uimhreacha airithe aige a imríonn sé i gcónaí, de bharr gur dhein sé staidéar ar na h-algartamaí, mar dheá, agus cailleann sé £50 den £300 a ghoid sé óna mhathair in aon chasadh amháin den roth. 

Ní fada go mbionn £150 caillte aige – ach ansan bíonn bua aige.  Ardaíonn a chroí – ach ní mhaireann sin ach seal mar ní raibh ach codán bheag den gheall iomlán aige ar an uimhir sin agus mar sin is bua i bhfad níos lú ná mar atá sé ag súil atá ann. 

Thuas seal, thíos seal a bhíonn an saol againn go léir – ach is thíos seal a bhíonn sé furmhór an ama dár gcara.  

Is de bhunadh Chonamara é Seán T. Ó Meallaigh – ach líonann sé an charachtar seo ó iarthar Bhéal Feirste go h-iomlán, tá gach mír foirfe, a chanúint, a gheaitsí.   Tá an seit deartha ag Mags Mulvey foirfe, bhuaigh sé gradam amharclainne an Irish Times i 2023 as ucht dearadh seite.

Táimíd taobh amuigh de chasaíne ar Shráid an Chaisleáin, an príomh shráid ó lár Bhéal Feirste go dtí an iarthar, sráid atá lán le carachtair na cathrach cois cuain.  Sráid neamh gheilliúil é Sráid an Chaisleáin agus tá daoine a dhéarfadh go bhfuil cuma gruama air.

Related Reads

Opinion: The British political class has it in for Kneecap - they just don't get it

Is anseo nó congarach atá na tithe tabhairne ceoil traidisiúnta is iomráití – leithéidí, An Hercules, Kelly’s Cellar agus Maddens – ach tá taobh dorcha freisin, mar a bhíonn i ngach chathair.  Is anseo a bhíonn na casaíní, siopaí lascaine, aindiúlaithe drugaí agus meisceoirí ag lorg déirce freisin. 

Is píosa amharclainne lán le faobhar é seo – agus ní sparáileann an scríobhneoir é féin ó scian a phinn. Ag an deireadh, fagann sé comhairle linn.  When it stops being fun, stop. Tá an dráma tiomnaithe ag an scríbhneoir dá mhathair, Aoife Ní Riain, a cailleadh cúpla bliain ó shin.  Tá gach rud pearsanta.  

Dráma é seo atá lán le firinne atá searbh ar uairibh – ach tá croí aige agus léiríonn sé seo go bhfuil dramaíocht na Gaeilge beo beathach, bíodh is go bhfuil sé ar an ngannchuid. 

Is mór an chreidiúint é don gcompántas, an stiurthóir Bríd Ó Gallchoir, an t-aisteoir, Seán T. Ó Meallaigh agus bheifeá ag súil go bhfaigheadh siad an tacaíocht is gá chun leanúint leis an obair cheannródach seo.

Tá tacaíocht á fháil ag Beartas Gaeltachta The Journal ón Scéim Tuairiscithe ar Dhaonláthas Áitiúil.